புதுமுக ஜோடிக்கு நிபந்தனை போட்ட மணிரத்னம்

கார்த்திக் மகன் மற்றும் ராதா மகளை ஜோடியாக வைத்து இயக்குனர் மணிரத்னம் படம் ஒன்றை இயக்குகிறார்.

விக்ரம், ஐஸ்வர்யாராய் நடித்த ராவணன் படத்தையடுத்து மணிரத்னம் புதிய படம் இயக்குகிறார். இப்படத்தில் கார்த்திக் மகன் கவுதமை கதாநாயகனாக அறிமுகப்படுத்துகிறார். அவருக்கு ஜோடியாக நடிக்க ராதாவின் இரண்டாவது மகள் துளசியை தெரிவு செய்துள்ளார். இவர் கோ படத்தில் நடித்த கார்த்திகாவின் தங்கை. சில நாட்களுக்கு முன்பு கவுதம், துளசி இருவரையும் ரகசிய இடத்துக்கு வரவழைத்த மணிரத்னம் விதவிதமான காஸ்டியூம்களில் பல்வேறு விதமான கோணங்களில் புகைப்படங்கள் எடுத்தார். பின்னர் இருவருக்கும் ‘டெஸ்ட் ஷூட்’ எனப்படும் நடிப்பு ஒத்திகை நடத்தி வீடியோவில் பதிவு செய்தார். இதில் திருப்தி அடைந்த மணிரத்னம் படத்தின் அடுத்த கட்ட பணிகளை தொடங்கி உள்ளார். கவுதம், துளசி இருவரின் புகைப்படங்களை மீடியாக்களில் வெளியிட விரும்பாத மணிரத்னம் ஷூட்டிங் முடியும் வரை பொது நிகழ்ச்சிகளில் பங்கேற்ககூடாது என்று இருவருக்கும் நிபந்தனை விதித்திருக்கிறார். இப்படத்துக்கு ஏ.ஆர்.ரகுமான் இசை அமைக்கிறார், வைரமுத்து பாடல்கள் எழுதுகிறார்.